یہ اختیار میں ہے نہ وہ اختیار میں

یہ اختیار میں ہے نہ وہ اختیار میں

کیا بے بسی ہے عالم ناپائیدار میں

کیفیتیں بہار کے نغموں میں اب کہاں

اب وہ بہار ہی نہیں فصل بہار میں

کل تک جو شمع محفل کیف و سرور تھا

الجھا وہ آج گردش لیل و نہار میں

مجھ کو ثبات جیب و گریباں نہیں پسند

میں خوش ہوں اپنے پیرہن تار تار میں

کیوں اپنی بے کسی پہ میں اظہار غم کروں

کیا دخل مجھ کو مرضیٔ پروردگار میں

نذرانہ گر یہ تیرا نہیں ہے تو اے نسیمؔ

خوشبو کہاں سے آئی ہے گیسوئے یار میں

دنیا تصورات کی برباد ہو گئی

رونق تھی تیرے دم سے اس اجڑے دیار میں

جوہرؔ نہ پوچھ صدمۂ طول شب فراق

تلخی تھی موت سے بھی سوا انتظار میں