ye iKHtiyar mein hai na wo iKHtiyar mein

ye iḳhtiyār meñ hai na vo iḳhtiyār meñ

kyā bebasī hai ālam-e-nā-pā.edār meñ

kaifiyyateñ bahār ke naġhmoñ meñ ab kahāñ

ab vo bahār hī nahīñ fasl-e-bahār meñ

kal tak jo sham.a-e-mahfil-e-kaif-o-surūr thā

uljhā vo aaj gardish-e-lail-o-nahār meñ

mujh ko sabāt-e-jaib-o-garebāñ nahīñ pasand

maiñ ḳhush huuñ apne pairahan-e-tār-tār meñ

kyoñ apnī be-kasī pe maiñ iz.hār-e-ġham karūñ

kyā daḳhl mujh ko marzī-e-parvardigār meñ

nazrāna gar ye terā nahīñ hai to ai 'nasīm'

ḳhushbū kahāñ se aa.ī hai gesū-e-yār meñ

duniyā tasavvurāt kī barbād ho ga.ī

raunaq thī tere dam se is ujḌe dayār meñ

'jauhar' na pūchh sadma-e-tūl-e-shab-e-firāq

talḳhī thī maut se bhī sivā intizār meñ

ye iKHtiyar mein hai na wo iKHtiyar mein

kya bebasi hai aalam-e-na-paedar mein

kaifiyyaten bahaar ke naghmon mein ab kahan

ab wo bahaar hi nahin fasl-e-bahaar mein

kal tak jo shama-e-mahfil-e-kaif-o-surur tha

uljha wo aaj gardish-e-lail-o-nahaar mein

mujh ko sabaat-e-jaib-o-gareban nahin pasand

main KHush hun apne pairahan-e-tar-tar mein

kyon apni be-kasi pe main izhaar-e-gham karun

kya daKHl mujh ko marzi-e-parwardigar mein

nazrana gar ye tera nahin hai to ai 'nasim'

KHushbu kahan se aai hai gesu-e-yar mein

duniya tasawwuraat ki barbaad ho gai

raunaq thi tere dam se is ujDe dayar mein

'jauhar' na puchh sadma-e-tul-e-shab-e-firaq

talKHi thi maut se bhi siwa intizar mein