یہ ان دنوں ہیں کہاں رابطے بہم اس کے

یہ ان دنوں ہیں کہاں رابطے بہم اس کے

بلند کیسی فضاؤں میں ہیں علم اس کے

یہ فصل کیسی ہواؤں نے منتشر کر دی

کہ بال بکھرے ہیں اور سانس بے ردھم اس کے

اترنے ہی نہ دیا ہم کو پار دریا نے

کہ ہم سمجھ ہی نہیں پائے پیچ و خم اس کے

چمک رہا ہے انہی جگنوؤں سے ویرانہ

کہ میرے دشت میں ہیں جا بجا قدم اس کے

ہمیشہ ہم کو ملے یہ چراغ جلتے ہوئے

ہمیشہ ہم کو ملے آنچلوں میں نم اس کے

ازل سے ہم اسی تقسیم پر بہت خوش ہیں

ازل سے لوح ہماری ہے اور قلم اس کے