ye iqamat hamein paigham-e-safar deti hai

ye iqāmat hameñ paiġhām-e-safar detī hai

zindagī maut ke aane kī ḳhabar detī hai

zāl-e-duniyā hai ajab tarah kī allāma-e-dahr

mard-e-dīñ-dār ko bhī dahriya kar detī hai

baḌhtī jaatī hai jo mashq-e-sitam us zālim kī

kuchh mohabbat mirī islāh magar detī hai

fā.eda de tire bīmār ko kyā ḳhaak davā

ab to iksīr bhī diije to zarar detī hai

sham.a ghabrā na shab-e-ġham se ki koī dam meñ

tujh ko kāfūr-e-safedi-e-sahar detī hai

ġhuncha hañstā hai tire aage jo gustāḳhī se

chaTḳhanā muñh pe vahīñ bād-e-sahar detī hai

sham.a bhī kam nahīñ kuchh ishq meñ parvāne se

jaan detā hai agar vo to ye sar detī hai

dam-ba-dam zaḳhm pe ik zaḳhm hai dam lene kī

mujh ko fursat nahīñ vo teġh-e-nazar detī hai

kahte sunte nahīñ kuchh ham to shab-e-hijr meñ par

nāla-e-dil kā javāb āh-e-jigar detī hai

tīra-baḳhtī mirī kartī hai pareshāñ mujh ko

tohmat is zulf-e-siyah-fām pe dhar detī hai

naḳhl-e-mizhgāñ se hai kyā jāniye kyā chashm-e-samar

chashm paanī kī jagah ḳhūn-e-jigar detī hai

detī sharbat hai kise zahr bharī aañkh tirī

ain ehsān hai vo zahr bhī gar detī hai

koī ġhammāz nahīñ merī taraf se ai 'zauq'

kaan us ke mirī fariyād hī bhar detī hai

ye iqamat hamein paigham-e-safar deti hai

zindagi maut ke aane ki KHabar deti hai

zal-e-duniya hai ajab tarah ki allama-e-dahr

mard-e-din-dar ko bhi dahriya kar deti hai

baDhti jati hai jo mashq-e-sitam us zalim ki

kuchh mohabbat meri islah magar deti hai

faeda de tere bimar ko kya KHak dawa

ab to iksir bhi dije to zarar deti hai

shama ghabra na shab-e-gham se ki koi dam mein

tujh ko kafur-e-safedi-e-sahar deti hai

ghuncha hansta hai tere aage jo gustaKHi se

chaTKHana munh pe wahin baad-e-sahar deti hai

shama bhi kam nahin kuchh ishq mein parwane se

jaan deta hai agar wo to ye sar deti hai

dam-ba-dam zaKHm pe ek zaKHm hai dam lene ki

mujh ko fursat nahin wo tegh-e-nazar deti hai

kahte sunte nahin kuchh hum to shab-e-hijr mein par

nala-e-dil ka jawab aah-e-jigar deti hai

tira-baKHti meri karti hai pareshan mujh ko

tohmat is zulf-e-siyah-fam pe dhar deti hai

naKHl-e-mizhgan se hai kya jaaniye kya chashm-e-samar

chashm pani ki jagah KHun-e-jigar deti hai

deti sharbat hai kise zahr bhari aankh teri

ain ehsan hai wo zahr bhi gar deti hai

koi ghammaz nahin meri taraf se ai 'zauq'

kan us ke meri fariyaad hi bhar deti hai