ye ishq agar aisa pur-asrar na hota

ye ishq agar aisā pur-asrār na hotā

mansūr kabhī koī sar-e-dār na hotā

zanjīr-zanī hotī na har saañs meñ merī

dil dard kā aise jo alam-dār na hotā

phir chāñd nahīñ kartā kabhī ashk-fishānī

gar TuuTe sitāroñ kā azādār na hotā

kuchh rishtoñ ko maiñ saath kabhī rakh nahīñ paatī

mujh meñ jo agar koī adākār na hotā

is dil meñ tirā aks farozāñ nahīñ rahtā

gar shīsha mire dil kā chamakdār na hotā

maiñ ḳhud ko ka.ī baar banā letī abhī tak

gar lams mujhe terā ye darkār na hotā

gar us pe tirā bhed khulā hotā ai saaqī

phir shaiḳh ko mai-ḳhāne se inkār na hotā

phir ḳhaak maza detā barastā huā sāvan

is rut meñ agar hijr kā āzār na hotā

sad-shukr ki aiboñ pe mire parda paḌā hai

kyā hotā agar merā vo sattār na hotā

har chand ki patthar huuñ magar TuuT rahī huuñ

ai kaash tū patthar kā talabgār na hotā

ye ishq agar aisa pur-asrar na hota

mansur kabhi koi sar-e-dar na hota

zanjir-zani hoti na har sans mein meri

dil dard ka aise jo alam-dar na hota

phir chand nahin karta kabhi ashk-fishani

gar TuTe sitaron ka azadar na hota

kuchh rishton ko main sath kabhi rakh nahin pati

mujh mein jo agar koi adakar na hota

is dil mein tera aks farozan nahin rahta

gar shisha mere dil ka chamakdar na hota

main KHud ko kai bar bana leti abhi tak

gar lams mujhe tera ye darkar na hota

gar us pe tera bhed khula hota ai saqi

phir shaiKH ko mai-KHane se inkar na hota

phir KHak maza deta barasta hua sawan

is rut mein agar hijr ka aazar na hota

sad-shukr ki aibon pe mere parda paDa hai

kya hota agar mera wo sattar na hota

har chand ki patthar hun magar TuT rahi hun

ai kash tu patthar ka talabgar na hota