ye ishq hai wahshat hai ki aashufta-sari hai

ye ishq hai vahshat hai ki āshufta-sarī hai

jo kuchh hai mire sar pe magar tāj-varī hai

āñkhoñ meñ chamaktī hai kashish us ke badan kī

jaltī hai zamīñ dhuup kī har shāḳh harī hai

har chāre se baḌhtā hai mire zaḳhm kā risnā

la.anat hai agar vaqt kī ye chāragarī hai

har mauj meñ hai us ke badan ke ka.ī jaadū

vo rashk-e-qamar rashk-e-jināñ rashk-e-parī hai

ummīd bhī ḳhud lauT ke ab aa na sakegī

is daur ke rahbar kī ajab rāhbarī hai

Thahrā hī nahīñ dasht-navardī kā musāfir

āshiq ke muqaddar meñ faqat dar-ba-darī hai

sharmā ke shab-e-ġham mirī bāñhoñ meñ simaT aa

maiñ ne hī sitāroñ se terī maañg bharī hai

mujh se vo 'nadīm' ab bhī ta.alluq na rakheñge

aadat hai burī merī har ik baat kharī hai

ye ishq hai wahshat hai ki aashufta-sari hai

jo kuchh hai mere sar pe magar taj-wari hai

aankhon mein chamakti hai kashish us ke badan ki

jalti hai zamin dhup ki har shaKH hari hai

har chaare se baDhta hai mere zaKHm ka risna

lanat hai agar waqt ki ye chaaragari hai

har mauj mein hai us ke badan ke kai jadu

wo rashk-e-qamar rashk-e-jinan rashk-e-pari hai

ummid bhi KHud lauT ke ab aa na sakegi

is daur ke rahbar ki ajab rahbari hai

Thahra hi nahin dasht-nawardi ka musafir

aashiq ke muqaddar mein faqat dar-ba-dari hai

sharma ke shab-e-gham meri banhon mein simaT aa

main ne hi sitaron se teri mang bhari hai

mujh se wo 'nadim' ab bhi talluq na rakhenge

aadat hai buri meri har ek baat khari hai