ye ishq ki hai rah na yun Dagmaga ke chal

ye ishq kī hai raah na yuuñ Dagmagā ke chal

himmat ko apnī tol qadam ko jamā ke chal

rāh-e-vafā hai is meñ na yuuñ muñh banā ke chal

kāñToñ ko rauñd rauñd ke tū muskurā ke chal

sham-e-yaqīñ kī lau ko zarā aur tez kar

zulmat meñ rahravoñ ko bhī rasta dikhā ke chal

gardish falak kī tez hai raftār terī sust

manzil hai duur apne qadam ab baḌhā ke chal

dushman jo dost ke haiñ vo nārāz haiñ to hoñ

siine pe zaḳhm un kī jafāoñ kā khā ke chal

tīroñ kī baaḌh aane de apne qadam na rok

un kī ḳhushī yahī hai tū ḳhuuñ meñ nahā ke chal

bahtā hai ḳhuuñ to bahne de bahne kī chiiz hai

qatroñ se ḳhūn-e-surḳh ke gulshan khilā ke chal

himmat ke jaam sabr ke miinā se nosh kar

naqsh-e-qadam se apne tū rasta banā ke chal

jaltā rahe bas us kī tamannā kā ik diyā

us ke sivā haiñ jitne diye sab bujhā ke chal

ai mīr-e-kārvāñ tirī ḳhidmat meñ arz hai

jo gir rahe haiñ raah meñ un ko uThā ke chal

rasta kaThin hai tū hai bahut nā-tavāñ 'urūj'

sultān-e-kā.enāt ko haamī banā ke chal

ye ishq ki hai rah na yun Dagmaga ke chal

himmat ko apni tol qadam ko jama ke chal

rah-e-wafa hai is mein na yun munh bana ke chal

kanTon ko raund raund ke tu muskura ke chal

sham-e-yaqin ki lau ko zara aur tez kar

zulmat mein rahrawon ko bhi rasta dikha ke chal

gardish falak ki tez hai raftar teri sust

manzil hai dur apne qadam ab baDha ke chal

dushman jo dost ke hain wo naraaz hain to hon

sine pe zaKHm un ki jafaon ka kha ke chal

tiron ki baDh aane de apne qadam na rok

un ki KHushi yahi hai tu KHun mein naha ke chal

bahta hai KHun to bahne de bahne ki chiz hai

qatron se KHun-e-surKH ke gulshan khila ke chal

himmat ke jam sabr ke mina se nosh kar

naqsh-e-qadam se apne tu rasta bana ke chal

jalta rahe bas us ki tamanna ka ek diya

us ke siwa hain jitne diye sab bujha ke chal

ai mir-e-karwan teri KHidmat mein arz hai

jo gir rahe hain rah mein un ko uTha ke chal

rasta kaThin hai tu hai bahut na-tawan 'uruj'

sultan-e-kaenat ko hami bana ke chal