یہ عشق والے دلوں کو ہی گھر بناتے ہیں

یہ عشق والے دلوں کو ہی گھر بناتے ہیں

یہ وہ پرند ہیں جن کو قفس ہی بھاتے ہیں

عجیب ان کی طبیعت عجب ہے خودداری

یہ دل جھکاتے ہیں سر کو نہیں جھکاتے ہیں

خیالی لوگ خیالی ہیں بستیاں ان کی

اکیلے بیٹھ کے یہ محفلیں سجاتے ہیں

ہوا سے پھول سے خوشبو سے بات کرتے ہیں

یہ ان کی سنتے ہیں اپنی انہیں سناتے ہیں

نہ جانے کس کی کہانی انہیں رلاتی ہے

نہ جانے کس کے فسانے انہیں ہنساتے ہیں

خلا میں پھیرتے رہتے ہیں انگلیاں اپنی

یہ زندگی کے نئے زاویے بناتے ہیں