ye ishq wo hai ki jis ka nasha na utrega

ye 'ishq vo hai ki jis kā nasha na utregā

is āsmān se ab ye ḳhudā na utregā

ye rang-e-girya rahegā jo tere kūche meñ

idhar se koī bhī hañstā huā na guzregā

jo tere paañv falak par dhare rahe yūñhī

zamīñ pe sabza-e-rang-e-hinā na utregā

lagā diyā jo use mere ḳhūn-e-nāhaq ne

zabān-e-shahr se ab ye maza na utregā

utaar laa.e kisī bhī ġhubār-e-rāh kā 'aks

ab is qadar bhī mirā aa.ina na utregā

nadī pe mohr lagā dī shanāvarī ne mirī

is āb-e-ḳhās meñ ab dūsrā na utregā

lazīz bhī hai ravāñ bhī bahut magar 'ehsās'

mire gale se tirā zā.iqa na utregā

ye 'ishq wo hai ki jis ka nasha na utrega

is aasman se ab ye KHuda na utrega

ye rang-e-girya rahega jo tere kuche mein

idhar se koi bhi hansta hua na guzrega

jo tere panw falak par dhare rahe yunhi

zamin pe sabza-e-rang-e-hina na utrega

laga diya jo use mere KHun-e-nahaq ne

zaban-e-shahr se ab ye maza na utrega

utar lae kisi bhi ghubar-e-rah ka 'aks

ab is qadar bhi mera aaina na utrega

nadi pe mohr laga di shanawari ne meri

is aab-e-KHas mein ab dusra na utrega

laziz bhi hai rawan bhi bahut magar 'ehsas'

mere gale se tera zaiqa na utrega