ye jaan kar tujhe koi KHushi nahin hogi

ye jaan kar tujhe koī ḳhushī nahīñ hogī

ki tere baad bhī mujh meñ kamī nahīñ hogī

ye saarā jhagḌā tirā hai jo tū nahīñ hogā

yahāñ kisī kī bhī phir dushmanī nahīñ hogī

maiñ ek din koī tasvīr bhī banā.ūñgā

ye aur baat ki vo aap kī nahīñ hogī

maiñ is liye tirī āñkhoñ ko saath rakhtā huuñ

maiñ jāntā huuñ vahāñ raushnī nahīñ hogī

ye zindagī kisī bichhḌe kā ġham manāte hue

bas ek lamhe se zyāda rukī nahīñ hogī

hamāre jism kī duniyā ḳhizāñ-rasīda hai

tumhāre chhūne se kyā ye harī nahīñ hogī

vo jis kī aañkh meñ ab tak mashāl zinda hai

vo maañ to T-V bhī ab dekhtī nahīñ hogī

yahāñ siyāsat-o-maz.hab pe jang hogī faqat

mirī zamīn pe ab shā.irī nahīñ hogī

ye jaan kar tujhe koi KHushi nahin hogi

ki tere baad bhi mujh mein kami nahin hogi

ye sara jhagDa tera hai jo tu nahin hoga

yahan kisi ki bhi phir dushmani nahin hogi

main ek din koi taswir bhi banaunga

ye aur baat ki wo aap ki nahin hogi

main is liye teri aankhon ko sath rakhta hun

main jaanta hun wahan raushni nahin hogi

ye zindagi kisi bichhDe ka gham manate hue

bas ek lamhe se zyaada ruki nahin hogi

hamare jism ki duniya KHizan-rasida hai

tumhaare chhune se kya ye hari nahin hogi

wo jis ki aankh mein ab tak mashaal zinda hai

wo man to T-V bhi ab dekhti nahin hogi

yahan siyasat-o-mazhab pe jang hogi faqat

meri zamin pe ab shairi nahin hogi