ye jabr-e-zindagi na uThaen to kya karen

ye jabr-e-zindagī na uThā.eñ to kyā kareñ

taḌpeñ magar taḌapne na paa.eñ to kyā kareñ

ab apnī mahfiloñ se bhī aatī hai bū-e-ġhair

jaa.eñ to kyā kareñ jo na jaa.eñ to kyā kareñ

qismat meñ apnī sub.h kī ab raushnī kahāñ

ashkoñ ke bhī diye na jalā.eñ to kyā kareñ

kitnī hī rāteñ jaag ke āñkhoñ meñ kaaT diiñ

bedāriyāñ bhī ḳhvāb dikhā.eñ to kyā kareñ

vo rañg-o-bū ke qāfile raste hoñ jin ke band

dīvār-e-bāġh phāñd na paa.eñ to kyā kareñ

kāñToñ ke din bhī phir ga.e raas aa ga.ī bahār

chhīnī ga.iiñ guloñ kī qabā.eñ to kyā kareñ

girtā hai har palak ke jhapakne pe ik hijāb

āñkhoñ ko intizār sikhā.eñ to kyā kareñ

har raushnī 'sirāj' charāġh-e-haram nahīñ

is sat.h par nigāh ko laa.eñ to kyā kareñ

ye jabr-e-zindagi na uThaen to kya karen

taDpen magar taDapne na paen to kya karen

ab apni mahfilon se bhi aati hai bu-e-ghair

jaen to kya karen jo na jaen to kya karen

qismat mein apni subh ki ab raushni kahan

ashkon ke bhi diye na jalaen to kya karen

kitni hi raaten jag ke aankhon mein kaT din

bedariyan bhi KHwab dikhaen to kya karen

wo rang-o-bu ke qafile raste hon jin ke band

diwar-e-bagh phand na paen to kya karen

kanTon ke din bhi phir gae ras aa gai bahaar

chhini gain gulon ki qabaen to kya karen

girta hai har palak ke jhapakne pe ek hijab

aankhon ko intizar sikhaen to kya karen

har raushni 'siraj' charagh-e-haram nahin

is sath par nigah ko laen to kya karen