ye jahan-e-ab-o-gil lagta hai ek maya mujhe

ye jahān-e-āb-o-gil lagtā hai ik maayā mujhe

har-qadam par justujū ne jis kī bahkāyā mujhe

zindagī-bhar mere apnoñ ne diyā mujh ko fareb

the jo begāne unhoñ ne aa ke apnāyā mujhe

va.ada-e-imroz-o-fardā meñ ulajh kar rah gayā

zindagī-bhar sabz-bāġh ik aisā dikhlāyā mujhe

ik muammā jaise ho sab ke liye merā vajūd

har kisī ne apne apne zarf tak paayā mujhe

jis ko dekho gardish-e-hālāt kā hai vo shikār

har koī jaise nazar aatā ho ghabrāyā mujhe

ahl-e-duniyā ne diye haiñ is qadar mujh ko fareb

kartā hai vahshat-zada ab apnā hī saayā mujhe

us kī zulf-e-ḳham-ba-ḳham se ab nikalnā hai muhāl

ġhamza-o-nāz-o-adā se aisā uljhāyā mujhe

ab jahāñ koī nahīñ mere liye rāh-e-farār

merā jazb-e-shauq āḳhir kis jagah laayā mujhe

jā.ūñ to jā.ūñ kahāñ koī nahīñ hai ḳhizr-e-rāh

umr-bhar josh-e-junūñ ne mere taḌpāyā mujhe

ab uḌātā hai mirī sahrā-navardī kā mazāq

ishq karne ke liye thā jis ne uksāyā mujhe

kar dī sab apnī matā-e-zindagī jis par nisār

ye jahān-e-rañg-o-bū hargiz na raas aayā mujhe

maiñ samajhtā thā jise apnā rafīq-e-zindagī

taḳhta-e-mashq-e-sitam us ne hī banvāyā mujhe

thā mirā jo hāshiya-bardār 'barqī'-āzamī

us ne hī tauq-e-ġhulāmī aa ke pahnāyā mujhe

ye jahan-e-ab-o-gil lagta hai ek maya mujhe

har-qadam par justuju ne jis ki bahkaya mujhe

zindagi-bhar mere apnon ne diya mujh ko fareb

the jo begane unhon ne aa ke apnaya mujhe

wada-e-imroz-o-farda mein ulajh kar rah gaya

zindagi-bhar sabz-bagh ek aisa dikhlaya mujhe

ek muamma jaise ho sab ke liye mera wajud

har kisi ne apne apne zarf tak paya mujhe

jis ko dekho gardish-e-haalat ka hai wo shikar

har koi jaise nazar aata ho ghabraya mujhe

ahl-e-duniya ne diye hain is qadar mujh ko fareb

karta hai wahshat-zada ab apna hi saya mujhe

us ki zulf-e-KHam-ba-KHam se ab nikalna hai muhaal

ghamza-o-naz-o-ada se aisa uljhaya mujhe

ab jahan koi nahin mere liye rah-e-farar

mera jazb-e-shauq aaKHir kis jagah laya mujhe

jaun to jaun kahan koi nahin hai KHizr-e-rah

umr-bhar josh-e-junun ne mere taDpaya mujhe

ab uData hai meri sahra-nawardi ka mazaq

ishq karne ke liye tha jis ne uksaya mujhe

kar di sab apni mata-e-zindagi jis par nisar

ye jahan-e-rang-o-bu hargiz na ras aaya mujhe

main samajhta tha jise apna rafiq-e-zindagi

taKHta-e-mashq-e-sitam us ne hi banwaya mujhe

tha mera jo hashiya-bardar 'barqi'-azami

us ne hi tauq-e-ghulami aa ke pahnaya mujhe