ye jang wo hai ki ab KHud bhi haarna chahun

ye jang vo hai ki ab ḳhud bhī hārnā chāhūñ

magar maiñ is ke liye bhī tirī razā chāhūñ

mire ġhulām mire aa.ine uThā laanā

ki maiñ is aag ko paanī meñ dekhnā chāhūñ

maiñ shāḳh shāḳh tirī nik.hateñ fuzūñ dekhūñ

maiñ taaq taaq tirī raushnī savā chāhūñ

aTā huā tirī ḳhushbū se pairahan rakkhūñ

bhare hue tire rañgoñ meñ dast o pā chāhūñ

tamām shahr ḳhamoshī kī niiñd soyā hai

maiñ aise vaqt meñ ik ḳhanjar-e-navā chāhūñ

jo ḳhema-gāh se niklūñ to qatl-gāh talak

paTā huā tire a.azā se rāsta chāhūñ

maiñ ahd-nāma-e-tanhā.ī lene aa.ī huuñ

fasīl-e-hijr kā ik ek baab vā chāhūñ

mirī ridā.eñ kanīzoñ meñ baañT diiñ jis ne

ḳhirāj-e-sāya-e-dīvār us se kyā chāhūñ

ye jang wo hai ki ab KHud bhi haarna chahun

magar main is ke liye bhi teri raza chahun

mere ghulam mere aaine uTha lana

ki main is aag ko pani mein dekhna chahun

main shaKH shaKH teri nikhaten fuzun dekhun

main taq taq teri raushni sawa chahun

aTa hua teri KHushbu se pairahan rakkhun

bhare hue tere rangon mein dast o pa chahun

tamam shahr KHamoshi ki nind soya hai

main aise waqt mein ek KHanjar-e-nawa chahun

jo KHema-gah se niklun to qatl-gah talak

paTa hua tere aaza se rasta chahun

main ahd-nama-e-tanhai lene aai hun

fasil-e-hijr ka ek ek bab wa chahun

meri ridaen kanizon mein banT din jis ne

KHiraj-e-saya-e-diwar us se kya chahun