ye ji mein hai ki mohabbat ka bab likhkungi

ye jī meñ hai ki mohabbat kā baab likhkūñgī

janāb-e-man ko maiñ ālī-janāb likkhūñgī

kabhī jo bhūle se paḌh le vo jaan hī legā

maiñ rāz-e-ishq ko yuuñ be-hisāb likkhūñgī

jo hausla hai to muñh pher kar guzar jaa.e

maiñ us kī chashm-e-karam ko itaab likkhūñgī

mire nasīb kā dār-o-madār hai us par

dil-e-ḳharāb ko ḳhāna-ḳharāb likkhūñgī

hisāb lūñgī tirī kaj-adā.ī kā aksar

kabhī vafā ko tirī be-hisāb likkhūñgī

buland parcham-e-insāniyat rahe jis meñ

maiñ daur-e-nau kā vo a.alā nisāb likkhūñgī

hazār mujh ko malāmat kā sāmnā ho magar

azāb-e-zīst ko kār-e-savāb likkhūñgī

jo mere baad paḌhī jaa.e ek muddat tak

maiñ husn-o-ishq kī aisī kitāb likhūñgī

ye ji mein hai ki mohabbat ka bab likhkungi

janab-e-man ko main aali-janab likkhungi

kabhi jo bhule se paDh le wo jaan hi lega

main raaz-e-ishq ko yun be-hisab likkhungi

jo hausla hai to munh pher kar guzar jae

main us ki chashm-e-karam ko itab likkhungi

mere nasib ka dar-o-madar hai us par

dil-e-KHarab ko KHana-KHarab likkhungi

hisab lungi teri kaj-adai ka aksar

kabhi wafa ko teri be-hisab likkhungi

buland parcham-e-insaniyat rahe jis mein

main daur-e-nau ka wo aala nisab likkhungi

hazar mujh ko malamat ka samna ho magar

azab-e-zist ko kar-e-sawab likkhungi

jo mere baad paDhi jae ek muddat tak

main husn-o-ishq ki aisi kitab likhungi