ye jo apne KHuda se Darte hain

ye jo apne ḳhudā se Darte haiñ

ham kisī bad-duā se Darte haiñ

varna parda uThā deñ duniyā kā

sirf apnī hayā se Darte haiñ

aur udāsī kahīñ na ug aa.e

ghar kī āb-o-havā se Darte haiñ

ḳhair ho un kī kaj-adā.ī kī

ham to apnī vafā se Darte haiñ

mudda.ī ko banā na deñ mujrim

munsifoñ kī adā se Darte haiñ

shab ke jaage abhī to so.e the

'fātima' ham sabā se Darte haiñ

ye jo apne KHuda se Darte hain

hum kisi bad-dua se Darte hain

warna parda uTha den duniya ka

sirf apni haya se Darte hain

aur udasi kahin na ug aae

ghar ki aab-o-hawa se Darte hain

KHair ho un ki kaj-adai ki

hum to apni wafa se Darte hain

muddai ko bana na den mujrim

munsifon ki ada se Darte hain

shab ke jage abhi to soe the

'fatima' hum saba se Darte hain