ye jo ek sail-e-fana hai mere pichhe pichhe

ye jo ik sail-e-fanā hai mire pīchhe pīchhe

mere hone kī sazā hai mire pīchhe pīchhe

aage aage hai mire dil ke chaTaḳhne kī sadā

aur mirī gard-e-anā hai mire pīchhe pīchhe

zindagī thak ke kisī moḌ pe ruktī hī nahīñ

kab se ye ābla-pā hai mire pīchhe pīchhe

apnā saaya to maiñ dariyā meñ bahā aayā thā

kaun phir bhaag rahā hai mire pīchhe pīchhe

paañv par paañv ko rakhtā hai chalā aatā hai

mirā naqsh-e-kaf-e-pā hai mire pīchhe pīchhe

merī tanhā.ī se Takrā ke palaT jā.egī

ye jo ḳhushbu-e-qabā hai mire pīchhe pīchhe

maiñ to dauḌā huuñ ḳhud apne hī ta.āqub meñ 'farīd'

chāñd kyuuñ bhaag paḌā hai mire pīchhe pīchhe

ye jo ek sail-e-fana hai mere pichhe pichhe

mere hone ki saza hai mere pichhe pichhe

aage aage hai mere dil ke chaTaKHne ki sada

aur meri gard-e-ana hai mere pichhe pichhe

zindagi thak ke kisi moD pe rukti hi nahin

kab se ye aabla-pa hai mere pichhe pichhe

apna saya to main dariya mein baha aaya tha

kaun phir bhag raha hai mere pichhe pichhe

panw par panw ko rakhta hai chala aata hai

mera naqsh-e-kaf-e-pa hai mere pichhe pichhe

meri tanhai se Takra ke palaT jaegi

ye jo KHushbu-e-qaba hai mere pichhe pichhe

main to dauDa hun KHud apne hi taaqub mein 'farid'

chand kyun bhag paDa hai mere pichhe pichhe