ye jo mere andar phaili KHamoshi hai

ye jo mere andar phailī ḳhāmoshī hai

tum kyā jaano kitnī gahrī ḳhāmoshī hai

us kī apnī hī ik chhoTī sī duniyā hai

ik guḌiyā hai ek sahelī ḳhāmoshī hai

terā saaya tere saath safar kartā hai

mere saath musalsal chaltī ḳhāmoshī hai

furqat kā dukh bas vo samjhe jis par biite

maiñ huuñ suunā ghar hai gahrī ḳhāmoshī hai

shab ke pichhle lamhoñ meñ aksar dekhā hai

tanhā.ī se mil kar rotī ḳhāmoshī hai

ye mausam ye manzar rūThe rūThe se haiñ

jaise sard ravayye vaisī ḳhāmoshī hai

lagtā hai ki tum ne bhī kuchh dekh liyā hai

har lamhe jo tum par taarī ḳhāmoshī hai

mujh ko 'ansar' roz pareshāñ kar detī hai

tere hoñToñ par jo rahtī ḳhāmoshī hai

ye jo mere andar phaili KHamoshi hai

tum kya jaano kitni gahri KHamoshi hai

us ki apni hi ek chhoTi si duniya hai

ek guDiya hai ek saheli KHamoshi hai

tera saya tere sath safar karta hai

mere sath musalsal chalti KHamoshi hai

furqat ka dukh bas wo samjhe jis par bite

main hun suna ghar hai gahri KHamoshi hai

shab ke pichhle lamhon mein aksar dekha hai

tanhai se mil kar roti KHamoshi hai

ye mausam ye manzar ruThe ruThe se hain

jaise sard rawayye waisi KHamoshi hai

lagta hai ki tum ne bhi kuchh dekh liya hai

har lamhe jo tum par tari KHamoshi hai

mujh ko 'ansar' roz pareshan kar deti hai

tere honTon par jo rahti KHamoshi hai