ye jo mujh par nikhaar hai sain

ye jo mujh par nikhār hai sā.īñ

aap hī kī bahār hai sā.īñ

aap chāheñ to jaan bhī le leñ

aap ko iḳhtiyār hai sā.īñ

tum milāte ho bichhḌe logoñ ko

ek merā bhī yaar hai sā.īñ

kisī khūñTī se bāñdh diije use

dil baḌā be-mahār hai sā.īñ

'ishq meñ laġhzishoñ pe kiije mu'āf

sā.īñ ye pahlī baar hai sā.īñ

kul milā kar hai jo bhī kuchh merā

aap se musta'ār hai sā.īñ

ek kashtī banā hī diije mujhe

koī dariyā ke paar hai sā.īñ

roz aañsū kamā ke laatā huuñ

ġham mirā rozgār hai sā.īñ

vus.at-e-rizq kī du'ā diije

dard kā kārobār hai sā.īñ

ḳhār-zāroñ se ho ke aayā huuñ

pairahan tār-tār hai sā.īñ

kabhī aa kar to dekhiye ki ye dil

kaisā ujḌā dayār hai sā.īñ

ye jo mujh par nikhaar hai sain

aap hi ki bahaar hai sain

aap chahen to jaan bhi le len

aap ko iKHtiyar hai sain

tum milate ho bichhDe logon ko

ek mera bhi yar hai sain

kisi khunTi se bandh dije use

dil baDa be-mahaar hai sain

'ishq mein laghzishon pe kije mu'af

sain ye pahli bar hai sain

kul mila kar hai jo bhi kuchh mera

aap se musta'ar hai sain

ek kashti bana hi dije mujhe

koi dariya ke par hai sain

roz aansu kama ke lata hun

gham mera rozgar hai sain

wusat-e-rizq ki du'a dije

dard ka karobar hai sain

KHar-zaron se ho ke aaya hun

pairahan tar-tar hai sain

kabhi aa kar to dekhiye ki ye dil

kaisa ujDa dayar hai sain