ye jo rangin tabassum ki ada hai mujh mein

ye jo rañgīn tabassum kī adā hai mujh meñ

mujh ko lagtā hai koī mere sivā hai mujh meñ

ḳhud bhī hairāñ huuñ azal se ki ye kyā hai mujh meñ

kaun shah-rag se mirī bol rahā hai mujh meñ

umar bhar jis ko tire ġham kī amānat samjhā

ab vahī tār-e-nafas TuuT gayā hai mujh meñ

ek ḳhushbū sī ubhartī hai nafas se mere

ho na ho aaj koī aan basā hai mujh meñ

mere qadmoñ pe zamāne kī jabīñ jhuk jaa.e

devtāoñ kī tarah ek anā hai mujh meñ

tum to kun kah ke nigāhoñ se chhupe ho lekin

har ghaḌī ek nayā hashr bapā hai mujh meñ

kaun thā jo mire ehsās ko raushan kartā

umr bhar sirf mirā dil hī jalā hai mujh meñ

dil kabhī zulmat-e-fardā se hirāsāñ na huā

ek ḳhurshīd nayā roz ugā hai mujh meñ

talḳh-kāmī se to kuchh aur nikhartī hai 'hayāt'

kis liye zahr koī ghol rahā hai mujh meñ

ye jo rangin tabassum ki ada hai mujh mein

mujh ko lagta hai koi mere siwa hai mujh mein

KHud bhi hairan hun azal se ki ye kya hai mujh mein

kaun shah-rag se meri bol raha hai mujh mein

umar bhar jis ko tere gham ki amanat samjha

ab wahi tar-e-nafas TuT gaya hai mujh mein

ek KHushbu si ubharti hai nafas se mere

ho na ho aaj koi aan basa hai mujh mein

mere qadmon pe zamane ki jabin jhuk jae

dewtaon ki tarah ek ana hai mujh mein

tum to kun kah ke nigahon se chhupe ho lekin

har ghaDi ek naya hashr bapa hai mujh mein

kaun tha jo mere ehsas ko raushan karta

umr bhar sirf mera dil hi jala hai mujh mein

dil kabhi zulmat-e-farda se hirasan na hua

ek KHurshid naya roz uga hai mujh mein

talKH-kaami se to kuchh aur nikharti hai 'hayat'

kis liye zahr koi ghol raha hai mujh mein