ye jo suraj hai ye jab sham ko Dhal jata hai

ye jo sūraj hai ye jab shaam ko Dhal jaatā hai

jo chamaktā huā manzar hai badal jaatā hai

koī ġham-ḳhāna-e-duniyā meñ Thahartā hī nahīñ

aaj jo paañv yahāñ dhartā hai kal jaatā hai

bujhne lagtī hai damakte hue mahtāb kī lau

jab charāg-e-ruḳh-e-raushan tirā jal jaatā hai

yuuñ to sab chalte haiñ manzil kī taraf saath magar

jo Thahartā nahīñ vo aage nikal jaatā hai

'ishq jaisā koī rishta nahīñ tujh se lekin

tū jo aa jaatā hai dil merā bahal jaatā hai

roz talvār laTaktī hai mirī gardan par

roz ḳhatra mire mar jaane kā Tal jaatā hai

sab haiñ zālim kī kamānoñ ke nishāne pe magar

hai jo shā.ista-e-nāvak vo sañbhal jaatā hai

she'r meñ shor na misre' meñ talātum hai 'anīs'

kuchh to kar varna ye uslūb-e-ġhazal jaatā hai

ye jo suraj hai ye jab sham ko Dhal jata hai

jo chamakta hua manzar hai badal jata hai

koi gham-KHana-e-duniya mein Thaharta hi nahin

aaj jo panw yahan dharta hai kal jata hai

bujhne lagti hai damakte hue mahtab ki lau

jab charag-e-ruKH-e-raushan tera jal jata hai

yun to sab chalte hain manzil ki taraf sath magar

jo Thaharta nahin wo aage nikal jata hai

'ishq jaisa koi rishta nahin tujh se lekin

tu jo aa jata hai dil mera bahal jata hai

roz talwar laTakti hai meri gardan par

roz KHatra mere mar jaane ka Tal jata hai

sab hain zalim ki kamanon ke nishane pe magar

hai jo shaista-e-nawak wo sanbhal jata hai

she'r mein shor na misre' mein talatum hai 'anis'

kuchh to kar warna ye uslub-e-ghazal jata hai