ye jo teri aankhon mein mani-e-wafa sa hai

ye jo terī āñkhoñ meñ ma.anī-e-vafā sā hai

kāsa-e-tamannā ke harf-e-mudda.ā sā hai

mere ḳhuun kī surḳhī surḳhī-e-vafā Thahrī

jis se rū-e-qātil bhī surḳh-rū banā sā hai

qatl-gāh-e-armāñ hai jis kī mahfil-e-ishrat

vo nigār-e-fitna-zā paikar-e-vafā sā hai

jab se mujh ko hāsil hai tere qurb kī daulat

naqsh-e-sañg-e-pā.inda mujh pe aa.ina sā hai

lafz aur ma.anī kā ye ta.alluq-e-bāham

pesh-e-dīda-e-bīnā rishta-e-vafā sā hai

raḳhsh-e-fikr ko apne kījiye zarā mahmez

nau-ba-nau mazāmīñ kā dar abhī khulā sā hai

bāb-e-shahr-e-irfāñ ke nūr-e-chashm kā hai faiz

parcham-e-jahūl-e-vaqt jo jhukā jhukā sā hai

dushmanoñ ke narġhe meñ maiñ khaḌā huuñ tanhā sā

ma.arka mohabbat kā jañg-e-karbalā sā hai

hoñT tere phūloñ se baat terī ḳhushbū sī

ruup chāñd sā terā dil bhī aa.ina sā hai

parcham-e-mohabbat hai jab se mere hāthoñ meñ

dard dil-nashīñ sā hai zaḳhm dil-rubā sā hai

dam meñ sar uThātā hai dam meñ TuuT jaatā hai

dil bhī bahr-e-ulfat meñ koī bulbulā sā hai

shor-e-hashr barpā hai yā ki shor-e-tanhā.ī

haiñ bujhī bujhī āñkheñ dil Darā Darā sā hai

vo nigāh-e-jānāñ kā ġhamza-e-balā-an.gez

mus.haf-e-mohabbat ke harf-e-ibtidā sā hai

mere dil kī ḳhātir to ye fasāna-e-hastī

zaḳhm-e-be-rafū sā hai dard-e-lā-davā sā hai

bas tirī nigāhoñ meñ ehtijāj hai bātil

har jafā munāsib sī har sitam ravā sā hai

niiñd kyuuñ nahīñ aatī ḳhvāb ḳhvāb āñkhoñ ko

shahr-e-jāñ meñ har jānib kyuuñ ye rat-jagā sā hai

chehra-e-mohabbat par hai usī se tābānī

ye ġhubār pā-e-nāz ġhāza-e-vafā sā hai

mujh ko mil hī jā.egī ik na ek din manzil

bas isī tavaqqo par dil meñ hausla sā hai

kaun hai jo rakhtā hai dost is qadar mujh ko

ajnabī sī duniyā meñ kaun āshnā sā hai

ai 'zafar' na chhoḌegā vo mujhe duā denā

yuuñ to hai vo barham sā yuuñ to vo ḳhafā sā hai

ye jo teri aankhon mein mani-e-wafa sa hai

kasa-e-tamanna ke harf-e-muddaa sa hai

mere KHun ki surKHi surKHi-e-wafa Thahri

jis se ru-e-qatil bhi surKH-ru bana sa hai

qatl-gah-e-arman hai jis ki mahfil-e-ishrat

wo nigar-e-fitna-za paikar-e-wafa sa hai

jab se mujh ko hasil hai tere qurb ki daulat

naqsh-e-sang-e-painda mujh pe aaina sa hai

lafz aur mani ka ye talluq-e-baham

pesh-e-dida-e-bina rishta-e-wafa sa hai

raKHsh-e-fikr ko apne kijiye zara mahmez

nau-ba-nau mazamin ka dar abhi khula sa hai

bab-e-shahr-e-irfan ke nur-e-chashm ka hai faiz

parcham-e-jahul-e-waqt jo jhuka jhuka sa hai

dushmanon ke narghe mein main khaDa hun tanha sa

marka mohabbat ka jang-e-karbala sa hai

honT tere phulon se baat teri KHushbu si

rup chand sa tera dil bhi aaina sa hai

parcham-e-mohabbat hai jab se mere hathon mein

dard dil-nashin sa hai zaKHm dil-ruba sa hai

dam mein sar uThata hai dam mein TuT jata hai

dil bhi bahr-e-ulfat mein koi bulbula sa hai

shor-e-hashr barpa hai ya ki shor-e-tanhai

hain bujhi bujhi aankhen dil Dara Dara sa hai

wo nigah-e-jaanan ka ghamza-e-bala-angez

mushaf-e-mohabbat ke harf-e-ibtida sa hai

mere dil ki KHatir to ye fasana-e-hasti

zaKHm-e-be-rafu sa hai dard-e-la-dawa sa hai

bas teri nigahon mein ehtijaj hai baatil

har jafa munasib si har sitam rawa sa hai

nind kyun nahin aati KHwab KHwab aankhon ko

shahr-e-jaan mein har jaanib kyun ye rat-jaga sa hai

chehra-e-mohabbat par hai usi se tabani

ye ghubar pa-e-naz ghaza-e-wafa sa hai

mujh ko mil hi jaegi ek na ek din manzil

bas isi tawaqqo par dil mein hausla sa hai

kaun hai jo rakhta hai dost is qadar mujh ko

ajnabi si duniya mein kaun aashna sa hai

ai 'zafar' na chhoDega wo mujhe dua dena

yun to hai wo barham sa yun to wo KHafa sa hai