ye jo tum dekh rahe ho KHas-o-KHashak pe KHak

ye jo tum dekh rahe ho ḳhas-o-ḳhāshāk pe ḳhaak

is se baḌh kar hai mirī ḳhvāhish-e-sad-chāk pe ḳhaak

gar koī ḳhvāb nahīñ hai mirī āñkhoñ meñ to phir

mere sāmān pe hasrat mirī imlāk pe ḳhaak

maiñ ne uḌne hī nahīñ dī hai rah-e-ishq meñ gard

maiñ ne paḌne hī nahīñ dī tirī poshāk pe ḳhaak

nisbat-e-ḳhāk pe sharmindagī kyoñ ho mujh ko

dastakeñ detī hai jā kar dar-e-laulāk pe ḳhaak

ye jo taḳhsīs-e-zan-o-mard hai ye vahm hai bas

tum mujhe dekhnā jab pahuñche mirī chaak pe ḳhaak

ye jo hai aadmī kā azm-e-safar is ke tufail

nazar aa.egī kisī din rah-e-aflāk pe ḳhaak

yuuñ bhī tum kyā ho faqat ḳhaak 'tabassum' biibī

aur phir baiThnī hai aa ke kal is ḳhaak pe ḳhaak

ye jo tum dekh rahe ho KHas-o-KHashak pe KHak

is se baDh kar hai meri KHwahish-e-sad-chaak pe KHak

gar koi KHwab nahin hai meri aankhon mein to phir

mere saman pe hasrat meri imlak pe KHak

main ne uDne hi nahin di hai rah-e-ishq mein gard

main ne paDne hi nahin di teri poshak pe KHak

nisbat-e-KHak pe sharmindagi kyon ho mujh ko

dastaken deti hai ja kar dar-e-laulak pe KHak

ye jo taKHsis-e-zan-o-mard hai ye wahm hai bas

tum mujhe dekhna jab pahunche meri chaak pe KHak

ye jo hai aadmi ka azm-e-safar is ke tufail

nazar aaegi kisi din rah-e-aflak pe KHak

yun bhi tum kya ho faqat KHak 'tabassum' bibi

aur phir baiThni hai aa ke kal is KHak pe KHak