ye jo TuTe se hain alfaz sabhi mere hain

ye jo TuuTe se haiñ alfāz sabhī mere haiñ

jitne bikhre haiñ yahāñ saaz sabhī mere haiñ

aaj ke daur-e-zabāñ-bandī meñ mujh ko ab tak

de rahe haiñ jo ik āvāz sabhī mere haiñ

hukmrāñ nangā hai lekin ye kahe phirtā hai

resham o atlas o kam-ḳhvāb sabhī mere haiñ

ik zamāne se kaleje se rakhā hai in ko

dil meñ pinhāñ haiñ jo sab raaz sabhī mere haiñ

naġhma-zan jo the yahāñ aaj vo haiñ jaan ba-lab

jo bhī haiñ giit ke dam-sāz sabhī mere haiñ

zaat kī ek bulandī pe pahuñchne ke liye

bhīge par se jo haiñ parvāz sabhī mere haiñ

haañ isī tarah se ik umr guzārī hai 'naved'

chāhe jaise huuñ ye andāz sabhī mere haiñ

ye jo TuTe se hain alfaz sabhi mere hain

jitne bikhre hain yahan saz sabhi mere hain

aaj ke daur-e-zaban-bandi mein mujh ko ab tak

de rahe hain jo ek aawaz sabhi mere hain

hukmran nanga hai lekin ye kahe phirta hai

resham o atlas o kam-KHwab sabhi mere hain

ek zamane se kaleje se rakha hai in ko

dil mein pinhan hain jo sab raaz sabhi mere hain

naghma-zan jo the yahan aaj wo hain jaan ba-lab

jo bhi hain git ke dam-saz sabhi mere hain

zat ki ek bulandi pe pahunchne ke liye

bhige par se jo hain parwaz sabhi mere hain

han isi tarah se ek umr guzari hai 'nawed'

chahe jaise hun ye andaz sabhi mere hain