ye kaenat tera moajaza lage hai mujhe

ye kā.enāt tirā mo.ajaza lage hai mujhe

ḳhudā nahīñ hai magar tū ḳhudā lage hai mujhe

na apne haath uThāo na iltimās karo

kabhī kisī kī batāo duā lage hai mujhe

kise ḳhabar hai ki kab chaltī saañs ruk jaa.e

ye zindagī bhī fareb-e-qazā lage hai mujhe

tire visāl ne bechain kar diyā thā bahut

tirā firāq hī dil kī davā lage hai mujhe

har ek chiiz kī āñkhoñ se ḳhuun jaarī hai

tamām ḳhalq-e-ḳhudā ġham-zada lage hai mujhe

ye nā-tavānī-e-qalb-o-jigar pe bār-e-garāñ

guzishta vaqt kā ik hādsa lage hai mujhe

ye kaenat tera moajaza lage hai mujhe

KHuda nahin hai magar tu KHuda lage hai mujhe

na apne hath uThao na iltimas karo

kabhi kisi ki batao dua lage hai mujhe

kise KHabar hai ki kab chalti sans ruk jae

ye zindagi bhi fareb-e-qaza lage hai mujhe

tere visal ne bechain kar diya tha bahut

tera firaq hi dil ki dawa lage hai mujhe

har ek chiz ki aankhon se KHun jari hai

tamam KHalq-e-KHuda gham-zada lage hai mujhe

ye na-tawani-e-qalb-o-jigar pe bar-e-garan

guzishta waqt ka ek hadsa lage hai mujhe