یہ کاروبار فراغت تمام کرنے کو

یہ کاروبار فراغت تمام کرنے کو

میں صبح گھر سے نکلتا ہوں شام کرنے کو

میں اس کی آنکھ میں واپس وہ خواب چھوڑ آیا

جو اس نے بھیجا تھا نیندیں حرام کرنے کو

یہ اور بات کہ مجھ کو نہ تو سمجھ پایا

تڑپ رہا ہے زمانہ امام کرنے کو

جہاں میں کوئی میسر نہیں تو کیا غم ہے

سکوت لالہ و گل ہے کلام کرنے کو

کلی کو پھول بنا کر گزر گئی ہے بہار

ٹھہر گیا ہے یہ نم احترام کرنے کو

ابھی تو شاخ کے اندر نہاں ہے انگڑائی

مچل اٹھا ہے یہ گلشن سلام کرنے کو

غزال بھول گئے اپنی چوکڑی طاہرؔ

یہ کون دشت میں اترا خرام کرنے کو