یہ کب سے دفتر عشاق میں ہے نام مرا

یہ کب سے دفتر عشاق میں ہے نام مرا

لکھا تھا کلک ازل نے تجھے سلام مرا

زباں پہ رشک سے کب آ سکے گا نام مرا

کہیں گے حضرت موسیٰ بھلا سلام مرا

یہاں ہے نیم نگہ کا بھی شکریہ لب پر

نمک حرام نہیں زخم ناتمام مرا

خیال روئے منور ہے مطلع خورشید

فلک سے کرتا ہے باتیں چراغ شام مرا

عتاب باعث ناکامیٔ تمنا تھا

نگاہ لطف مگر کر رہی ہے کام مرا

الٰہی ہو مری ہستی کا عشق سے آغاز

قدوم ختم رسل پر ہو اختتام مرا

خدا کے واسطے اٹھو کہاں تلک غفلت

مسیح کرتے ہیں کچھ اور اہتمام مرا

مئے الست سے لبریز ساغر دل ہے

گھٹے بڑھے نہ سرور علی الدوام مرا

فلک سمجھتا ہے کچھ کھیل نالۂ دل کا

لگے نہ آگ تو شعلہؔ نہیں ہے نام مرا