ye kachche rang hain gahre main un ko dho nahin sakti

ye kachche rañg haiñ gahre maiñ un ko dho nahīñ saktī

sabhī kuchh jāntī huuñ is liye bhī ro nahīñ saktī

abhī tak aañkh ke har zāviye meñ hijr ke ġham haiñ

tumhāre ḳhvāb aate haiñ magar meñ so nahīñ saktī

purāne peḌ kī Tahnī huuñ par sarsabz huuñ ab tak

parinde āte-jāte haiñ maiñ būḌhī ho nahīñ saktī

mujhe vo sher kahne haiñ ki jin meñ dil dhaḌakte hoñ

maiñ naqlī phuul āñgan meñ kabhī bhī bo nahīñ saktī

bahādur maiñ banūñ jitnī magar ye bhī hai sach 'iqrā'

ki ab maiñ mar to saktī huuñ pa tujh ko kho nahīñ saktī

ye kachche rang hain gahre main un ko dho nahin sakti

sabhi kuchh jaanti hun is liye bhi ro nahin sakti

abhi tak aankh ke har zawiye mein hijr ke gham hain

tumhaare KHwab aate hain magar mein so nahin sakti

purane peD ki Tahni hun par sarsabz hun ab tak

parinde aate-jate hain main buDhi ho nahin sakti

mujhe wo sher kahne hain ki jin mein dil dhaDakte hon

main naqli phul aangan mein kabhi bhi bo nahin sakti

bahadur main banun jitni magar ye bhi hai sach 'iqra'

ki ab main mar to sakti hun pa tujh ko kho nahin sakti