ye kah ke raKHne Daliye un ke hijab mein

ye kah ke raḳhne Dāliye un ke hijāb meñ

achchhe bure kā haal khule kyā naqāb meñ

ḳhurshīd-zār hove zamīñ de jhaTak zarā

sau āftāb haiñ tire gard-e-naqāb meñ

be-etidālyāñ mirī zarf-e-tunak se haiñ

thā naqs kuchh na jauhar-e-sahbā-e-nāb meñ

uThne meñ sub.h ke ye kahāñ sar-girāniyāñ

zāhid ne mai kā jalva ye dekhā hai ḳhvāb meñ

tahqīq ho to jānūñ ki maiñ kyā huuñ qais kyā

likkhā huā hai yuuñ to sabhī kuchh kitāb meñ

maiñ aur zauq-e-bāda-kashī le ga.iiñ mujhe

ye kam-nigāhiyāñ tirī bazm-e-sharāb meñ

imdād-e-chashm kyā ho lagī dil ko aag jab

jalne ke ba.ad ḳhuuñ nahīñ rahtā kabāb meñ

haiñ donoñ misl-e-shīsha ye sāmān-e-sad-shikast

jaisā hai mere dil meñ nahīñ hai habāb meñ

anvār-e-fikr se na huā kuchh bhī inkishāf

jitnā baḌhe ham aur baḌhī jā hijāb meñ

ye umr aur ishq hai 'āzurda' jā-e-sharm

hazrat ye bāteñ phabtī haiñ ahd-e-shabāb meñ

ye kah ke raKHne Daliye un ke hijab mein

achchhe bure ka haal khule kya naqab mein

KHurshid-zar howe zamin de jhaTak zara

sau aaftab hain tere gard-e-naqab mein

be-etidalyan meri zarf-e-tunak se hain

tha naqs kuchh na jauhar-e-sahba-e-nab mein

uThne mein subh ke ye kahan sar-giraniyan

zahid ne mai ka jalwa ye dekha hai KHwab mein

tahqiq ho to jaanun ki main kya hun qais kya

likkha hua hai yun to sabhi kuchh kitab mein

main aur zauq-e-baada-kashi le gain mujhe

ye kam-nigahiyan teri bazm-e-sharab mein

imdad-e-chashm kya ho lagi dil ko aag jab

jalne ke baad KHun nahin rahta kabab mein

hain donon misl-e-shisha ye saman-e-sad-shikast

jaisa hai mere dil mein nahin hai habab mein

anwar-e-fikr se na hua kuchh bhi inkishaf

jitna baDhe hum aur baDhi ja hijab mein

ye umr aur ishq hai 'azurda' ja-e-sharm

hazrat ye baaten phabti hain ahd-e-shabab mein