یہ کہنا آسان نہیں ہے

یہ کہنا آسان نہیں ہے

دل میں کوئی ارمان ہے

ہمت کی تو پائی منزل

دنیا کا احسان نہیں ہے

لاکھ تسلی دی ہے تم نے

لیکن اطمینان نہیں ہے

ہائے محبت کی مجبوری

رونا بھی آسان نہیں ہے

چھوڑ تو دوں میں ان کا دامن

لیکن اب امکان نہیں ہے

پونچھ کے تم دامن سے تو دیکھو

آنسو ہیں طوفان نہیں ہے

ترک محبت توبہ توبہ

یہ میرا ایمان نہیں ہے

خاص تجلی ڈھونڈ رہا ہوں

کرنوں کی پہچان نہیں ہے

شوقؔ سمجھتے ہو جتنا تم

اتنا وہ نادان نہیں ہے