ye kaif kaif-e-mohabbat hai koi kya jaane

ye kaif kaif-e-mohabbat hai koī kyā jaane

chhalak rahe haiñ nigāhoñ meñ dil ke paimāne

kahāniyoñ hī pe buniyād hai haqīqat kī

haqīqatoñ hī se paidā hue haiñ afsāne

na ab vo ātish-e-namrūd hai na sho.ala-e-tūr

tirī nigāh ko kyā ho gayā ḳhudā jaane

hazār terī mohabbat ne rahnumā.ī kī

guzar sake na maqām-e-junūñ se dīvāne

unhī ko hāsil-e-yak-shahr-e-ārzū kahiye

mirī nigāh meñ ābād haiñ jo vīrāne

tujhe ḳhabar bhī hai is daur-e-ḳhasta-hālī meñ

ḳhud ahl-e-dil haiñ mazāq-e-vafā se begāne

junūñ fareb-e-ḳhirad hai ḳhirad fareb-e-nazar

mujhe kahīñ kā na rakkhā mirī tamannā ne

ye kaif kaif-e-mohabbat hai koi kya jaane

chhalak rahe hain nigahon mein dil ke paimane

kahaniyon hi pe buniyaad hai haqiqat ki

haqiqaton hi se paida hue hain afsane

na ab wo aatish-e-namrud hai na shoala-e-tur

teri nigah ko kya ho gaya KHuda jaane

hazar teri mohabbat ne rahnumai ki

guzar sake na maqam-e-junun se diwane

unhi ko hasil-e-yak-shahr-e-arzu kahiye

meri nigah mein aabaad hain jo virane

tujhe KHabar bhi hai is daur-e-KHasta-haali mein

KHud ahl-e-dil hain mazaq-e-wafa se begane

junun fareb-e-KHirad hai KHirad fareb-e-nazar

mujhe kahin ka na rakkha meri tamanna ne