ye kaisa chhir paDa karobar mein ab ke

ye kaisā chhīr paḌā kārobār meñ ab ke

sipāhī aane lage eqtidār meñ ab ke

havā charāġh jalāne kī baat kartī thī

hameñ bhī der lagī e'tibār meñ ab ke

bataur-e-dast-e-talab jo uThā.e jaate rahe

vo haath aa.e nahīñ haiñ shumār meñ ab ke

the jis kī jiit ke haamī na jis ke kār-guzār

hamārī haar huī us kī haar meñ ab ke

naved-e-sub.h na aa.ī to sab ne DhūñDā hai

vahī ḳhulūs tire shab-guzār meñ ab ke

tire ḳhayāl kī parchhā.iyāñ mahaktī thiiñ

ajiib rang rahā intizār meñ ab ke

nadī bhī jaise razā-mand thī samundar se

koī sadā na huī ābshār meñ ab ke

kal us ne baat bhī kī muskurā ke dekhā abhī

ye kaisā farq kifāyat-shi.ār meñ ab ke

Darā rahe the jo aaseb ghar meñ aane lage

bahut shigāf paḌe haiñ hisār meñ ab ke

matā-e-sabr-o-shakebā.ī saath detī rahī

na dil na dard rahā iḳhtiyār meñ ab ke

ye kaisa chhir paDa karobar mein ab ke

sipahi aane lage eqtidar mein ab ke

hawa charagh jalane ki baat karti thi

hamein bhi der lagi e'tibar mein ab ke

bataur-e-dast-e-talab jo uThae jate rahe

wo hath aae nahin hain shumar mein ab ke

the jis ki jit ke hami na jis ke kar-guzar

hamari haar hui us ki haar mein ab ke

nawed-e-subh na aai to sab ne DhunDa hai

wahi KHulus tere shab-guzar mein ab ke

tere KHayal ki parchhaiyan mahakti thin

ajib rang raha intizar mein ab ke

nadi bhi jaise raza-mand thi samundar se

koi sada na hui aabshaar mein ab ke

kal us ne baat bhi ki muskura ke dekha abhi

ye kaisa farq kifayat-shiar mein ab ke

Dara rahe the jo aaseb ghar mein aane lage

bahut shigaf paDe hain hisar mein ab ke

mata-e-sabr-o-shakebai sath deti rahi

na dil na dard raha iKHtiyar mein ab ke