ye kaisa daur ye kaisi sadi hai

ye kaisā daur ye kaisī sadī hai

jidhar dekho hujūm-e-be-dilī hai

bas itnī sī hamārī zindagī hai

saverā aa gayā raat aa rahī hai

vahī shab hai vahī bāra-darī hai

chalā aa tū ki bas terī kamī hai

charāġhoñ ne na jaane kah diyā kyā

havā dahlīz par Thahrī huī hai

sahar-dam qatl ho jā.egā sūraj

tabhī ye raat bhī sahmī huī hai

chalo is peḌ ke nazdīk dekho

mahak sī kuchh lahū kī aa rahī hai

tire chehre kī nuz.hat dekh lī kyā

shagufta kyoñ chaman kī har kalī hai

abhī sairāb ho jā.eñge ham log

vo dekho sāmne bahtī nadī hai

koī ghar chhoḌ kar hai jaane vaalā

darīche se udāsī jhāñktī hai

sitāre dam-ba-ḳhud haiñ chāñd ḳhāmosh

suhānī raat ruḳhsat ho rahī hai

jahāñ chhiḌte the ḳhushiyoñ ke tarāne

'mujīb' us ghar pe qābiz ḳhāmushī hai

ye kaisa daur ye kaisi sadi hai

jidhar dekho hujum-e-be-dili hai

bas itni si hamari zindagi hai

sawera aa gaya raat aa rahi hai

wahi shab hai wahi bara-dari hai

chala aa tu ki bas teri kami hai

charaghon ne na jaane kah diya kya

hawa dahliz par Thahri hui hai

sahar-dam qatl ho jaega suraj

tabhi ye raat bhi sahmi hui hai

chalo is peD ke nazdik dekho

mahak si kuchh lahu ki aa rahi hai

tere chehre ki nuzhat dekh li kya

shagufta kyon chaman ki har kali hai

abhi sairab ho jaenge hum log

wo dekho samne bahti nadi hai

koi ghar chhoD kar hai jaane wala

dariche se udasi jhankti hai

sitare dam-ba-KHud hain chand KHamosh

suhani raat ruKHsat ho rahi hai

jahan chhiDte the KHushiyon ke tarane

'mujib' us ghar pe qabiz KHamushi hai