ye kaisa shahr hai main kis ajaib-ghar mein rahta hun

ye kaisā shahr hai maiñ kis ajā.ib-ghar meñ rahtā huuñ

maiñ kis kī aañkh kā paanī huuñ kis patthar meñ rahtā huuñ

vo ḳhushbū is ta.alluq se bahut bechain sī hogī

maiñ kāñTā thā magar ik phuul ke bistar meñ rahtā huuñ

use ik din yahī ḳhāna-badoshī ḳhud batā.egī

maiñ apne ghar meñ rahtā huuñ ki us ke ghar meñ rahtā huuñ

agar mohlat mile to qātilān-e-shahr se pūchhūñ

maiñ kis kī jaan huuñ kyuuñ sīna-e-ḳhanjar meñ rahtā huuñ

mujhe ye be-panāhī kab tirā rasta dikhā.egī

tirī āvāz huuñ aur gumbad-e-be-dar meñ rahtā huuñ

ye sab ḳhush-posh chehre ho chuke haiñ munkashif mujh par

maiñ un ke darmiyāñ kyuuñ jāma-e-mahshar meñ rahtā huuñ

ḳhudī kyā chiiz hai 'ḳhurshīd-akbar' aur ḳhudā kyā hai

kahūñ maiñ kis zabāñ se dast-e-āhan-gar meñ rahtā huuñ

ye kaisa shahr hai main kis ajaib-ghar mein rahta hun

main kis ki aankh ka pani hun kis patthar mein rahta hun

wo KHushbu is talluq se bahut bechain si hogi

main kanTa tha magar ek phul ke bistar mein rahta hun

use ek din yahi KHana-badoshi KHud bataegi

main apne ghar mein rahta hun ki us ke ghar mein rahta hun

agar mohlat mile to qatilan-e-shahr se puchhun

main kis ki jaan hun kyun sina-e-KHanjar mein rahta hun

mujhe ye be-panahi kab tera rasta dikhaegi

teri aawaz hun aur gumbad-e-be-dar mein rahta hun

ye sab KHush-posh chehre ho chuke hain munkashif mujh par

main un ke darmiyan kyun jama-e-mahshar mein rahta hun

KHudi kya chiz hai 'KHurshid-akbar' aur KHuda kya hai

kahun main kis zaban se dast-e-ahan-gar mein rahta hun