ye kaisa shahr ka manzar dikhai deta hai

ye kaisā shahr kā manzar dikhā.ī detā hai

har ek haath meñ patthar dikhā.ī detā hai

ye kis gunāh kī pādāsh pā rahe haiñ ham

jo gardishoñ meñ muqaddar dikhā.ī detā hai

kisī ne pyaar se kar lī hai guftugū shāyad

jo us kā chehra munavvar dikhā.ī detā hai

kabhī sharāb ko bhī jo harām kahtā thā

ab us ke haath meñ sāġhar dikhā.ī detā hai

vafā kā 'ahd nibhāne kī kyā qasam khaa.ī

vo chehra aaj gul-e-tar dikhā.ī detā hai

Dubā sakā na mire aaj ye safīne ko

to be-qarār samundar dikhā.ī detā hai

udāsiyoñ ko yahāñ kaun rakh gayā 'rizvān'

fasurda ab jo har ik ghar dikhā.ī detā hai

ye kaisa shahr ka manzar dikhai deta hai

har ek hath mein patthar dikhai deta hai

ye kis gunah ki padash pa rahe hain hum

jo gardishon mein muqaddar dikhai deta hai

kisi ne pyar se kar li hai guftugu shayad

jo us ka chehra munawwar dikhai deta hai

kabhi sharab ko bhi jo haram kahta tha

ab us ke hath mein saghar dikhai deta hai

wafa ka 'ahd nibhane ki kya qasam khai

wo chehra aaj gul-e-tar dikhai deta hai

Duba saka na mere aaj ye safine ko

to be-qarar samundar dikhai deta hai

udasiyon ko yahan kaun rakh gaya 'rizwan'

fasurda ab jo har ek ghar dikhai deta hai