ye kaise malbe ke niche daba diya gaya hun

ye kaise malbe ke nīche dabā diyā gayā huuñ

mujhe badan se nikālo maiñ tañg aa gayā huuñ

kise dimāġh hai be-faiz sohbatoñ kā miyāñ

ḳhabar uḌā do ki maiñ shahr se chalā gayā huuñ

ma.āl-e-ishq-e-anā-gīr hai ye muḳhtasaran

maiñ vo darinda huuñ jo ḳhud ko hī chabā gayā huuñ

koī ghaḌī hai ki hotā huuñ āstīn meñ dafn

maiñ dil se bahtā huā aañkh tak to aa gayā huuñ

mirā thā markazī kirdār is kahānī meñ

baḌe salīqe se be-mājrā kiyā gayā huuñ

vo mujh ko dekh rahā hai ajab tahayyur se

na-jāne jhoñk meñ kyā kuchh use batā gayā huuñ

mujhe bhulā na sakegī ye rahguzār-e-junūñ

qadam jamā na sakā rañg to jamā gayā huuñ

sab ehtimām se pahuñche haiñ us kī bazm meñ aaj

maiñ apne haal meñ sarmast o mubtalā gayā huuñ

mire kahe se mire gird-o-pesh kuchh bhī nahīñ

so jo dikhāyā gayā hai vo dekhtā gayā huuñ

use batāyā nahīñ hijr meñ jo haal huā

jo baat sab se zarūrī thī vo chhupā gayā huuñ

ġhazal meñ khīñch ke rakh dī hai apnī jaañ irfān

har ek sher meñ dil kā lahū bahā gayā huuñ

ye kaise malbe ke niche daba diya gaya hun

mujhe badan se nikalo main tang aa gaya hun

kise dimagh hai be-faiz sohbaton ka miyan

KHabar uDa do ki main shahr se chala gaya hun

maal-e-ishq-e-ana-gir hai ye muKHtasaran

main wo darinda hun jo KHud ko hi chaba gaya hun

koi ghaDi hai ki hota hun aastin mein dafn

main dil se bahta hua aankh tak to aa gaya hun

mera tha markazi kirdar is kahani mein

baDe saliqe se be-majra kiya gaya hun

wo mujh ko dekh raha hai ajab tahayyur se

na-jaane jhonk mein kya kuchh use bata gaya hun

mujhe bhula na sakegi ye rahguzar-e-junun

qadam jama na saka rang to jama gaya hun

sab ehtimam se pahunche hain us ki bazm mein aaj

main apne haal mein sarmast o mubtala gaya hun

mere kahe se mere gird-o-pesh kuchh bhi nahin

so jo dikhaya gaya hai wo dekhta gaya hun

use bataya nahin hijr mein jo haal hua

jo baat sab se zaruri thi wo chhupa gaya hun

ghazal mein khinch ke rakh di hai apni jaan irfan

har ek sher mein dil ka lahu baha gaya hun