ye kaisi aag abhi ai sham tere dil mein baqi hai

ye kaisī aag abhī ai sham' tere dil meñ baaqī hai

koī parvāna jal marne ko kyā mahfil meñ baaqī hai

hazāroñ uTh ga.e duniyā se apnī jaan de de kar

magar ik bhiiḌ phir bhī kūcha-e-qātil meñ baaqī hai

hue vo mutma.in kyuuñ sirf mere dam nikalne par

abhī to ek duniyā-e-tamannā dil meñ baaqī hai

huā thā ġharq bahr-e-ishq is andāz se koī

ki naqsha Dūbne kā dīda-e-sāhil meñ baaqī hai

qazā se koī ye kah de ki mushtāq-e-shahādat huuñ

abhī ik marne vaalā kūcha-e-qātil meñ baaqī hai

kahāñ fursat hujūm-e-ranj-o-ġham se ham jo ye jāñcheñ

ki niklī kyā tamannā kyā tamannā dil meñ baaqī hai

abhī se apnā dil thāme hue kyuuñ log baiThe haiñ

abhī to hashr uThne ko tirī mahfil meñ baaqī hai

vahāñ the jam' jitne marne vaale mar ga.e vo sab

qazā le-de ke bas ab kūcha-e-qātil meñ baaqī hai

abhī se tū ne qātil myaan meñ talvār kyuuñ rakh lī

abhī to jaan thoḌī sī tan-e-'bismil' meñ baaqī hai

ye kaisi aag abhi ai sham' tere dil mein baqi hai

koi parwana jal marne ko kya mahfil mein baqi hai

hazaron uTh gae duniya se apni jaan de de kar

magar ek bhiD phir bhi kucha-e-qatil mein baqi hai

hue wo mutmain kyun sirf mere dam nikalne par

abhi to ek duniya-e-tamanna dil mein baqi hai

hua tha gharq bahr-e-ishq is andaz se koi

ki naqsha Dubne ka dida-e-sahil mein baqi hai

qaza se koi ye kah de ki mushtaq-e-shahadat hun

abhi ek marne wala kucha-e-qatil mein baqi hai

kahan fursat hujum-e-ranj-o-gham se hum jo ye jaanchen

ki nikli kya tamanna kya tamanna dil mein baqi hai

abhi se apna dil thame hue kyun log baiThe hain

abhi to hashr uThne ko teri mahfil mein baqi hai

wahan the jam' jitne marne wale mar gae wo sab

qaza le-de ke bas ab kucha-e-qatil mein baqi hai

abhi se tu ne qatil myan mein talwar kyun rakh li

abhi to jaan thoDi si tan-e-'bismil' mein baqi hai