ye kaisi fasl-e-bahaar aai gulon ka sina figar sa hai

ye kaisī fasl-e-bahār aa.ī guloñ kā siina figār sā hai

har ik nazar hai sukūñ se aarī har ek dil be-qarār sā hai

chaman ke jo pāsbāñ haiñ socheñ isī ko kahte haiñ kyā gulistāñ

shafaq meñ shāmil hai ġham kī surḳhī ufuq pe ḳhūn-e-bahār sā hai

harīf-e-mahkūmī-o-ġhulāmī huā hai mazdūr kā lahū phir

har ek jānib hai tez āñdhī har ek jānib ġhubār sā hai

urūj-e-ilm-o-hunar kī manzil karegā tai kis tarah mirā dil

hai pā-e-idrāk meñ tazalzul shu.ūr siina figār sā hai

ḳhayāl kī rahguzar to dekho fareb-e-zauq-e-nazar to dekho

har ek aahaT pe chauñktā hai vajūd-e-dil intizār sā hai

kisī kī aamad kā sun ke muzhda nasīm-e-ummīd muskurā.ī

har ek lamha hai kaif-āvar nigāh-o-dil meñ ḳhumār sā hai

udaas tārīk ḳhalvatoñ meñ hai aaj 'nāshād' kis kī aamad

nigāh meñ bijliyāñ farozāñ fazāoñ meñ intishār sā hai

ye kaisi fasl-e-bahaar aai gulon ka sina figar sa hai

har ek nazar hai sukun se aari har ek dil be-qarar sa hai

chaman ke jo pasban hain sochen isi ko kahte hain kya gulistan

shafaq mein shamil hai gham ki surKHi ufuq pe KHun-e-bahaar sa hai

harif-e-mahkumi-o-ghulami hua hai mazdur ka lahu phir

har ek jaanib hai tez aandhi har ek jaanib ghubar sa hai

uruj-e-ilm-o-hunar ki manzil karega tai kis tarah mera dil

hai pa-e-idrak mein tazalzul shuur sina figar sa hai

KHayal ki rahguzar to dekho fareb-e-zauq-e-nazar to dekho

har ek aahaT pe chaunkta hai wajud-e-dil intizar sa hai

kisi ki aamad ka sun ke muzhda nasim-e-ummid muskurai

har ek lamha hai kaif-awar nigah-o-dil mein KHumar sa hai

udas tarik KHalwaton mein hai aaj 'nashad' kis ki aamad

nigah mein bijliyan farozan fazaon mein intishaar sa hai