یہ کیسی فصل بہار آئی گلوں کا سینہ فگار سا ہے

یہ کیسی فصل بہار آئی گلوں کا سینہ فگار سا ہے

ہر اک نظر ہے سکوں سے عاری ہر ایک دل بے قرار سا ہے

چمن کے جو پاسباں ہیں سوچیں اسی کو کہتے ہیں کیا گلستاں

شفق میں شامل ہے غم کی سرخی افق پہ خون بہار سا ہے

حریف محکومی و غلامی ہوا ہے مزدور کا لہو پھر

ہر ایک جانب ہے تیز آندھی ہر ایک جانب غبار سا ہے

عروج علم و ہنر کی منزل کرے گا طے کس طرح مرا دل

ہے پائے ادراک میں تزلزل شعور سینہ فگار سا ہے

خیال کی رہ گزر تو دیکھو فریب ذوق نظر تو دیکھو

ہر ایک آہٹ پہ چونکتا ہے وجود دل انتظار سا ہے

کسی کی آمد کا سن کے مژدہ نسیم امید مسکرائی

ہر ایک لمحہ ہے کیف آور نگاہ و دل میں خمار سا ہے

اداس تاریک خلوتوں میں ہے آج ناشادؔ کس کی آمد

نگاہ میں بجلیاں فروزاں فضاؤں میں انتشار سا ہے