ye kaisi hurmat-e-gham hijr ne faraham ki

ye kaisī hurmat-e-ġham hijr ne farāham kī

darūn-e-qalb hai taarī fazā moharram kī

ḳhushī harām hai tā-āḳhir-e-nafas mujh par

na kar sakā maiñ hifāzat agar tire ġham kī

zamīn-e-dil pe ragaḌtā hai eḌiyāñ tirā ġham

ba-chashm-e-ḳhushk hikāyat likhī hai zamzam kī

mirā vujūd musallā thā raat bhar maiñ ne

nafas kī āmad-o-shud se namāz qaa.em kī

ka.ī dinoñ se bahut kaam thā so daftar meñ

tire ḳhayāl kī lau maiñ ne thoḌī maddham kī

ye kaisi hurmat-e-gham hijr ne faraham ki

darun-e-qalb hai tari faza moharram ki

KHushi haram hai ta-aKHir-e-nafas mujh par

na kar saka main hifazat agar tere gham ki

zamin-e-dil pe ragaDta hai eDiyan tera gham

ba-chashm-e-KHushk hikayat likhi hai zamzam ki

mera wujud musalla tha raat bhar main ne

nafas ki aamad-o-shud se namaz qaem ki

kai dinon se bahut kaam tha so daftar mein

tere KHayal ki lau main ne thoDi maddham ki