ye kaisi sargoshi-e-azal saz-e-dil ke parde hila rahi hai

ye kaisī sargoshī-e-azal sāz-e-dil ke parde hilā rahī hai

mirī samā.at khanak rahī hai ki terī āvāz aa rahī hai

havādis-e-roz-gār merī ḳhushī se kyā intiqām leñge

ki zindagī vo hasīn zid hai ki be-sabab muskurā rahī hai

tirā tabassum faroġh-e-hastī tirī nazar e'tibār-e-mastī

bahār iqrār kar rahī hai sharāb īmān lā rahī hai

fasāna-ḳhvāñ dekhnā shab-e-zindagī kā anjām to nahīñ hai

ki sham.a ke saath rafta rafta mujhe bhī kuchh niiñd aa rahī hai

agar koī ḳhaas chiiz hotī to ḳhair dāman bhigo bhī lete

sharāb se to bahut purāne mazāq kī baas aa rahī hai

ḳhirad ke TuuTe hue sitāre 'adam' kahāñ tak charāġh bante

junūñ kī raushan ravish hai āḳhir diloñ ko raste dikhā rahī hai

ye kaisi sargoshi-e-azal saz-e-dil ke parde hila rahi hai

meri samaat khanak rahi hai ki teri aawaz aa rahi hai

hawadis-e-roz-gar meri KHushi se kya intiqam lenge

ki zindagi wo hasin zid hai ki be-sabab muskura rahi hai

tera tabassum farogh-e-hasti teri nazar e'tibar-e-masti

bahaar iqrar kar rahi hai sharab iman la rahi hai

fasana-KHwan dekhna shab-e-zindagi ka anjam to nahin hai

ki shama ke sath rafta rafta mujhe bhi kuchh nind aa rahi hai

agar koi KHas chiz hoti to KHair daman bhigo bhi lete

sharab se to bahut purane mazaq ki bas aa rahi hai

KHirad ke TuTe hue sitare 'adam' kahan tak charagh bante

junun ki raushan rawish hai aaKHir dilon ko raste dikha rahi hai