ye kaisi shab ke dhundalkon ke aas-pas hai sham

ye kaisī shab ke dhuñdalkoñ ke ās-pās hai shaam

bahut udaas hai dekho bahut udaas hai shaam

humak rahī hai taġhayyur kī tund shāḳhoñ par

shafaq ke phuul se lipTī huī sī baas hai shaam

churā rahī haiñ ḳhalā.eñ jo us kī god kā nuur

siyāh raat ke Dar se rahīn-e-yās hai shaam

ulajh ga.ī hai ufuq meñ shafaq kī añgḌā.ī

umaD rahe haiñ dhuñdalke to bad-havās hai shaam

ye surḳhiyoñ meñ siyāhī ke reñgte Dore

dalīl-e-ḳhauf hai andāza-e-hirās hai shaam

ye lamhe lamhe ke sāñche meñ Dhaltī jaatī hai

zarūr ramz-e-mashiyyat se rū-shanās hai shaam

tapish ko ġham kī bujhā.e hai ashk-e-shabnam se

kisī ġharīb kī TuuTī huī sī aas hai shaam

vahī fareb-e-tamaddun hai phir nasīb ke naam

kisī kā vaqt-e-pareshāñ kisī ko raas hai shaam

guzar to jā.egī lekin ġham-e-sahar ban kar

shab-e-darāz kī ik muḳhtasar asaas hai shaam

palaT ke dekh zarā zāviye badal 'rāhī'

tirī nigāh pe mabnī tirā qayās hai shaam

ye kaisi shab ke dhundalkon ke aas-pas hai sham

bahut udas hai dekho bahut udas hai sham

humak rahi hai taghayyur ki tund shaKHon par

shafaq ke phul se lipTi hui si bas hai sham

chura rahi hain KHalaen jo us ki god ka nur

siyah raat ke Dar se rahin-e-yas hai sham

ulajh gai hai ufuq mein shafaq ki angDai

umaD rahe hain dhundalke to bad-hawas hai sham

ye surKHiyon mein siyahi ke rengte Dore

dalil-e-KHauf hai andaza-e-hiras hai sham

ye lamhe lamhe ke sanche mein Dhalti jati hai

zarur ramz-e-mashiyyat se ru-shanas hai sham

tapish ko gham ki bujhae hai ashk-e-shabnam se

kisi gharib ki TuTi hui si aas hai sham

wahi fareb-e-tamaddun hai phir nasib ke nam

kisi ka waqt-e-pareshan kisi ko ras hai sham

guzar to jaegi lekin gham-e-sahar ban kar

shab-e-daraaz ki ek muKHtasar asas hai sham

palaT ke dekh zara zawiye badal 'rahi'

teri nigah pe mabni tera qayas hai sham