ye kam nahin ke wahi sham ka sitara hai

ye kam nahīñ ke vahī shaam kā sitāra hai

jise fazīlat-e-tanhā.ī ne ubhārā hai

kahīñ surāġh nahīñ hai kisī bhī qātil kā

lahūluhān magar shahr kā nazāra hai

maiñ jā rahā huuñ mukammal vajūd paane ko

mujhe bhī sūrat-e-imkāñ ne ab pukārā hai

vo hañs ke har shab-e-zulmāt kaaT dete haiñ

vo jin ke siine meñ aflāk kā sipārā hai

charāġh jaltā rahegā hamesha ulfat kā

yahī vajūd ke anvār kā ishāra hai

ye kaisī sūrat-e-mahtāb khul rahī hai magar

zamīñ pe kis ne ise arsh se utārā hai

anā-shikār pe zāhir ye kab huā 'az.har'

use nibhāne meñ taqdīr kā ḳhasāra hai

ye kam nahin ke wahi sham ka sitara hai

jise fazilat-e-tanhai ne ubhaara hai

kahin suragh nahin hai kisi bhi qatil ka

lahuluhan magar shahr ka nazara hai

main ja raha hun mukammal wajud pane ko

mujhe bhi surat-e-imkan ne ab pukara hai

wo hans ke har shab-e-zulmat kaT dete hain

wo jin ke sine mein aflak ka sipara hai

charagh jalta rahega hamesha ulfat ka

yahi wajud ke anwar ka ishaara hai

ye kaisi surat-e-mahtab khul rahi hai magar

zamin pe kis ne ise arsh se utara hai

ana-shikar pe zahir ye kab hua 'azhar'

use nibhane mein taqdir ka KHasara hai