ye kamra aur ye gard-o-ghubar us ka hai

ye kamra aur ye gard-o-ġhubār us kā hai

vo jis ne aanā nahīñ intizār us kā hai

rukī huuñ zaḳhm ke raqbe meñ apnī marzī se

ye jāntī huuñ ki qurb-o-javār us kā hai

kisī ḳhasāre ke saude meñ haath aayā thā

so ek qīmtī shai meñ shumār us kā hai

faqat firāq to itnā nasha nahīñ rakhtā

maiñ laḌkhaḌāī huuñ jis se ḳhumār us kā hai

ḳharīd saktī thī so maiñ ḳharīd laa.ī huuñ

vo mere paas hai chāhe hazār us kā hai

darīda-jāñ huuñ darīda-libāsiyāñ bhī haiñ

magar ye kam to nahīñ taar taar us kā hai

maiñ saiñt saiñt ke kitnā sameT kar rakhkhūñ

ki kā.enāt bharā intishār us kā hai

na jaane boltī rahtī huuñ niiñd meñ kyā kyā

jo naam suntī huuñ maiñ baar baar us kā hai

maiñ ghar se jā.ūñ to taalā lagā ke jaatī huuñ

kuchh us kī shohrateñ kuchh e'tibār us kā hai

ye kamra aur ye gard-o-ghubar us ka hai

wo jis ne aana nahin intizar us ka hai

ruki hun zaKHm ke raqbe mein apni marzi se

ye jaanti hun ki qurb-o-jawar us ka hai

kisi KHasare ke saude mein hath aaya tha

so ek qimti shai mein shumar us ka hai

faqat firaq to itna nasha nahin rakhta

main laDkhaDai hun jis se KHumar us ka hai

KHarid sakti thi so main KHarid lai hun

wo mere pas hai chahe hazar us ka hai

darida-jaan hun darida-libasiyan bhi hain

magar ye kam to nahin tar tar us ka hai

main saint saint ke kitna sameT kar rakhkhun

ki kaenat bhara intishaar us ka hai

na jaane bolti rahti hun nind mein kya kya

jo nam sunti hun main bar bar us ka hai

main ghar se jaun to tala laga ke jati hun

kuchh us ki shohraten kuchh e'tibar us ka hai