یہ کرتب کر دکھانا چاہتا ہوں

یہ کرتب کر دکھانا چاہتا ہوں

تجھے میں بھول جانا چاہتا ہوں

بھٹک جاتا ہوں اکثر میں انہیں سے

نقوش پا مٹانا چاہتا ہوں

تجھے حاصل ہو خوشیوں کا تبسم

میں تجھ سے ہار جانا چاہتا ہوں

میں باہر ہوں تعلق سے دلوں کے

یقیں خود کو دلانا چاہتا ہوں

سنا ہے زہر میں لذت بہت ہے

کسی دن آزمانا چاہتا ہوں

اسے اک روز خود دیکھوں گا پہلے

تماشہ جو دکھانا چاہتا ہوں

مرا اپنا تو کچھ ہے ہی نہیں جب

تو پھر میں کیا گنوانا چاہتا ہوں

بہت دن سے ہی یہ ویراں پڑی ہے

حویلی دل کی ڈھانا چاہتا ہوں