یہ کون اس درجہ آتشیں رکھ رکھاؤ میں ہے

یہ کون اس درجہ آتشیں رکھ رکھاؤ میں ہے

یہ کس کا چہرہ ہے جو دہکتے الاؤ میں ہے

صدائے کن اس کے بعد شاید کبھی نہ آئے

ہماری تخلیق اپنے انتم پڑاؤ میں ہے

اسے ٹھہرنے کا حکم دے کر خراب مت کر

ندی کا سارا وجود اس کے بہاؤ میں ہے

یہ بنت حیرت وہ بے نیازی کا دیوتا ہے

ملیں گے کیا جب تضاد اتنا سوبھاؤ میں ہے

چناب غیظ و غضب بس اتنا خیال رکھنا

ہماری کل کائنات اس ٹوٹی ناؤ میں ہے

جو بے طرح کی گھٹا رکے تو ہم آنکھیں دیکھیں

ابھی یہ نیلا گلاب اک جل بھراؤ میں ہے