ye kaun sa maqam hai ai josh-e-be-KHudi

ye kaun sā maqām hai ai josh-e-be-ḳhudī

rasta batā rahā huuñ har ik rahnumā ko maiñ

donoñ hī kāmyāb hue haiñ talāsh maiñ

zāt-e-ḳhudā milī mujhe zāt-e-ḳhudā ko maiñ

miTTī uThā ke dekhtā huuñ rāh-e-shauq kī

bhūlā nahīñ huuñ josh-e-talab meñ fanā ko maiñ

hastī fanā huī to haqīqat ye khul ga.ī

maiñ ḳhud baqā huuñ kis liye DhūñDūñ baqā ko maiñ

kyūñkar maiñ is ko dushman-e-hastī qarār duuñ

paatā huuñ mudda.ā kā zarīya qazā ko maiñ

kyuuñ us kī justujū kā ho saudā mujhe 'ratan'

mujh se agar judā ho to DhūñDūñ ḳhudā ko maiñ

ye kaun sa maqam hai ai josh-e-be-KHudi

rasta bata raha hun har ek rahnuma ko main

donon hi kaamyab hue hain talash main

zat-e-KHuda mili mujhe zat-e-KHuda ko main

miTTi uTha ke dekhta hun rah-e-shauq ki

bhula nahin hun josh-e-talab mein fana ko main

hasti fana hui to haqiqat ye khul gai

main KHud baqa hun kis liye DhunDun baqa ko main

kyunkar main is ko dushman-e-hasti qarar dun

pata hun muddaa ka zariya qaza ko main

kyun us ki justuju ka ho sauda mujhe 'ratan'

mujh se agar juda ho to DhunDun KHuda ko main