ye KHaki pairahan ek ism ki bandish mein rahta hai

ye ḳhākī pairahan ik ism kī bandish meñ rahtā hai

zamāna har ghaḌī varna na.ī sāzish meñ rahtā hai

isī baa.is maiñ apnā nisf rakhtā huuñ añdhere meñ

mire atrāf bhī sūraj koī gardish meñ rahtā hai

maiñ ik parkār sā sayyār bhī huuñ aur sābit bhī

jahāñ saarā mire qadmoñ kī paimā.ish meñ rahtā hai

mirī āñkhoñ meñ ab hai maujzan bas ret vahshat kī

samundar ab kahāñ palkoñ kī har jumbish meñ rahtā hai

supurd-e-āb yuuñ hī to nahīñ kartā huuñ ḳhaak apnī

ajab miTTī ke ghulne kā mazā bārish meñ rahtā hai

tasallut hai kisī kā jab se apnī zaat par 'sārim'

hamārā dil bahut ārām-o-āsā.ish meñ rahtā hai

ye KHaki pairahan ek ism ki bandish mein rahta hai

zamana har ghaDi warna nai sazish mein rahta hai

isi bais main apna nisf rakhta hun andhere mein

mere atraf bhi suraj koi gardish mein rahta hai

main ek parkar sa sayyar bhi hun aur sabit bhi

jahan sara mere qadmon ki paimaish mein rahta hai

meri aankhon mein ab hai maujzan bas ret wahshat ki

samundar ab kahan palkon ki har jumbish mein rahta hai

supurd-e-ab yun hi to nahin karta hun KHak apni

ajab miTTi ke ghulne ka maza barish mein rahta hai

tasallut hai kisi ka jab se apni zat par 'sarim'

hamara dil bahut aaram-o-asaish mein rahta hai