ye KHabar aai hai aaj ek murshid-e-akmal ke pas

ye ḳhabar aa.ī hai aaj ik murshid-e-akmal ke paas

un ko dhamkāyā kisī ne railway-signal ke paas

husn-e-āvāra kā ai hamdam bhalā kyā e'tibār

aaj bhaTnāgar ke bas meñ hai to kal mittal ke paas

un kī vahshat se ye zāhir ho rahā hai ḳhud-ba-ḳhud

ye usī mauza.a meñ rahte haiñ jo hai mañgal ke paas

bāġhbāñ kī ab tavajjoh hai gulistāñ kī taraf

paude baḌh ke ḳhud lagā.e haiñ ka.ī kaT.hal ke paas

uTh gayā bazm-e-tarab se vo raqīb-e-rū-siyāh

rafta rafta haath jab pahuñchā mirā chappal ke paas

razm-gah meñ un se nazreñ laḌ rahī haiñ baar baar

ho rahā hai ek dañgal aur usī dañgal ke paas

log un kī bazm meñ rah kar bhī haiñ mahrūm-e-dīd

jāñ-ba-lab haiñ pyaas se baiThe hue haiñ nal ke paas

dekhiye ye bāda-e-rañgīñ kī adnā sī kashish

shaiḳh-sāhib aur khisak kar aa ga.e botal ke paas

nāseh-e-nādāñ kā shikva karnā hai bilkul fuzūl

vo to pāgal hai koī kyuuñ jaa.e phir pāgal ke paas

himmat-afzā.ī na jab ummāl-e-ma.amūlī ne kī

pahuñchī rishvat afsarān-e-darja-e-avval ke paas

'shauq'-sāhab mūnis-e-tanhā.ī kī hājat ho gar

to kisī din be-takalluf chaliye sevā-dil ke paas

ye KHabar aai hai aaj ek murshid-e-akmal ke pas

un ko dhamkaya kisi ne railway-signal ke pas

husn-e-awara ka ai hamdam bhala kya e'tibar

aaj bhaTnagar ke bas mein hai to kal mittal ke pas

un ki wahshat se ye zahir ho raha hai KHud-ba-KHud

ye usi mauza mein rahte hain jo hai mangal ke pas

baghban ki ab tawajjoh hai gulistan ki taraf

paude baDh ke KHud lagae hain kai kaThal ke pas

uTh gaya bazm-e-tarab se wo raqib-e-ru-siyah

rafta rafta hath jab pahuncha mera chappal ke pas

razm-gah mein un se nazren laD rahi hain bar bar

ho raha hai ek dangal aur usi dangal ke pas

log un ki bazm mein rah kar bhi hain mahrum-e-did

jaan-ba-lab hain pyas se baiThe hue hain nal ke pas

dekhiye ye baada-e-rangin ki adna si kashish

shaiKH-sahib aur khisak kar aa gae botal ke pas

naseh-e-nadan ka shikwa karna hai bilkul fuzul

wo to pagal hai koi kyun jae phir pagal ke pas

himmat-afzai na jab ummal-e-mamuli ne ki

pahunchi rishwat afsaran-e-darja-e-awwal ke pas

'shauq'-sahab munis-e-tanhai ki hajat ho gar

to kisi din be-takalluf chaliye sewa-dil ke pas