ye KHalq sari hawa mere nam kar degi

ye ḳhalq saarī havā mere naam kar degī

mire charāġhoñ kā jiinā harām kar degī

sunā hai dhuup ko ghar lauTne kī jaldī hai

vo aaj vaqt se pahle hī shaam kar degī

kuchh aur der jo Thahrā maiñ us kī āñkhoñ meñ

to chāñd tāroñ ko merā ġhulām kar degī

maiñ apne daur se bad-zan huuñ ibtidā to karūñ

ki aglī nasl mirā baaqī kaam kar degī

phir is ke ba.ad vo mujh se lipaT ke ro.egī

safar kā Thiik se sab intizām kar degī

ḳharīdne se to behtar hai us ko maañg hī luuñ

vagarna ūñche bahut apne daam kar degī

batāo is meñ bhī us kā koī ḳhasāra hai

vo shahr-e-ḳhvāb abhī mere naam kar degī

ye KHalq sari hawa mere nam kar degi

mere charaghon ka jina haram kar degi

suna hai dhup ko ghar lauTne ki jaldi hai

wo aaj waqt se pahle hi sham kar degi

kuchh aur der jo Thahra main us ki aankhon mein

to chand taron ko mera ghulam kar degi

main apne daur se bad-zan hun ibtida to karun

ki agli nasl mera baqi kaam kar degi

phir is ke baad wo mujh se lipaT ke roegi

safar ka Thik se sab intizam kar degi

KHaridne se to behtar hai us ko mang hi lun

wagarna unche bahut apne dam kar degi

batao is mein bhi us ka koi KHasara hai

wo shahr-e-KHwab abhi mere nam kar degi