یہ خلوتوں میں بھی سوچتے ہیں کہ ہم کہاں سے کہاں ہیں آئے

یہ خلوتوں میں بھی سوچتے ہیں کہ ہم کہاں سے کہاں ہیں آئے

کہ راہ منزل سے کیسے کیسے ہمیشہ ہم نے فریب کھائے

پرانے قصے بھلا کے ہم نے تمہارے وعدوں پہ آس باندھی

سنی ہیں ہم نے بھی داستانیں مگر کہاں ہم نے لب ہلائے

چتا جلی گر تو خواہشوں کے گئے زمانوں نے سر اٹھائے

دل حزیں کو یہ ضد تھی کوئی پھر آ کے شمع وفا جلائے

گزرتی جاتی ہیں لمبی صدیاں مگر کوئی ہم سخن نہیں ہے

کبھی کبھی تو یہ خامشی بھی نہ جانے کیا کیا ہمیں سنائے

یہ جانتے ہیں کہ لٹ چکے ہیں کئی دفعہ دل کے آستانے

مگر ابھی تک ہم آرزوؤں کی بستیاں دل میں ہیں بسائے

یہ بے بہا آب دار موتی انہیں گنوانے سے فائدہ کیا

اگر نہیں ہے کچھ اس کا حاصل تو کوئی کیوں اشک غم بہائے

کبھی تو اخفائے غم کی خاطر بھی مسکرانا پڑا ہے ہم کو

زمانہ اب تک سمجھ نہ پایا کہ ہم نے کیوں اتنے گیت گائے

خیال کی منزلوں سے گزرے گمان کی محفلیں بھی دیکھیں

مگر ستاروں سے اور آگے جہاں ہے کیسا سمجھ نہ پائے

بنا ہے اک عالم تحیر نئی فضا ہے نیا سماں ہے

حیات کے یہ عجیب لمحے نہ جانے کیا کیا پیام لائے

ہجوم آلام و غم سلامت مگر ہے پھر بھی کوئی خلا سا

یہی تو ہے راز زندگی کا بتائے ہانیؔ تو کیا بتائے